Mar 11 | ETR | STEP | Ili Yalusaleme beselagalamolö ga madela, sege Bedifagige Bedanige Olibebidaia ami nea, Yesuea ïe bëgëla aulo amoligi, äudä dafidila mosalolahilä,

aSama 118.25,26

Mark 11

Yesu e beaha aligilo Gini gadoi hamola Yalusaleme beselagalai

(Madiu 21.1-11, Ulugu 19.28-40, Yone 12.12-19)

1 Ili Yalusaleme beselagalamolö ga madela, sege Bedifagige Bedanige Olibebidaia ami nea, Yesuea ïe bëgëla aulo amoligi, äudä dafidila mosalolahilä, 2 elema sähalea, Segea ami awäla beselagalala beahamelële, sugua dögi üdïli afädë dolöea fila aulo made, ga madefalï gui gide begela negei neë bimolömelë. Dögi amo fisigäla wi sigi misialo. 3 Afädëa alima dögi abïdä fisigähala nabaseda, ema ado gomalä sämalo. Dafidilo Geloia webalä hamomolömelë. Amalahilä, ea fodolofalï sigi obëgëmalamolömelëla, alia amala sämalola säi. 4 Amala säi amo nabalahilä, ele awäla beselagalala beahamelebe, sugua dögi üdïli afädë mosöa nogila digalo, ifo baagido idiliba, gide begela negei neebe amo bealahilä, fisigäi. 5 Fisigäsebegi, udia dolö ami nefolalo amolia elema nabahalea, Abilia hamodelä, sugua dögi üdïli go fisigähala nabi. 6 Elea Yesuea sämalola säi amo gadola säsebegi, ilia hä, sigi mosalola säi. 7 Elea sugua dögi üdïli amo Yesu neebea sigi gaula obëgësebegi, sugua dögi amodaia fagulo fösilahilä Yesu fedala sulo. 8 Amala hamosebegi, udia dolö yafiea ilile fagulo neala idiafa föladigi, odoaea idiafa agesua fasela bäu gadoi dagabola gaula mafula föladigila awäha nelo. 9 Udia dolö nefolalo amoli Yesu awäse amo gadola, dafidila awäha nelo amoliage, hobeala maaha nelo amoliage, uuala säsäla awähalea, Agua. Nesege. Godeïe ëi gauia adadi.

Afädë Dafidilo Geloiïe ëigila maahago, Godea e neala obeägïmäia. 10 Nilïle nado Debidia beaha maadela sigi nelo amo gadola namolö neebe amoma obeägïdi. ^a
Selesaia fiia Godeïe ëi gauia adala nesegemola uuala säsäla awäha nelo. 11 Yesu e Yalusaleme beselagalalahilä, gobela ïlo mosöa ami awäla beahamelebe, nelebo elö elöla sulubadela difolalebe amo melï. Amo beaha maadelahilä, deadisebegi beala, giwilasi amolali Bedani obëgëi.

Yesuea äfäeoma säi

(Madiu 21.18-19)

12 Diala aiyo amogi ili Bedanilahilä awähalea Yesu e sïdëa baagoi. 13 Sïdëa baagosebegi holöbö wagadi madela beahamelebe äfäeo bäu dibe bealahilä, gägä negei walebelela bea asi. Bea awähamelebe gägä made negei, bäumu dibe melï. Mida, äfäeo gägä negelo segeyogi made amea bäumu dibe melï. 14 Amo bealahilä ea äfäeo amoma sähalea, Dïe gägä udia dolöea bu elö made molömelëla säi. Amo säi amo ïe bëgëla aulo amolia nabi.

Yesuea gobela ïlo mosöa awälahilä hamoi

(Madiu 21.12-19, Ulugu 19.45-48, Yone 2.13-22)

15 Ili Yalusaleme beselagalai. Beselagalalahilä, Yesu e gobela ïlo mosöa beselagalahamelebe, bidi neadigi, bidi nimolöïe negeladigisa difolalo amoli nesiladigisa nelo. Muni bedefalo auli amoge, haea maliabu gadoi bidi neaha aligilo amolile filo auli amoge, neala besula besigadasila hësögudulahilä, 16 gobela ïasia gedolo sege dibea wida, udia dolöea nelebo gaula dabiala misiabiola säla ï. 17 Amala sälahilä ea ilima säla olelesalea sähalea, Ado säla dëdëla negei dibe amo gomalä madele. Nïe mosö fifii asi sulubadelaea Godema adolo mosö neamelëla sämolömelëla dëdëi gaso, dilia fa nelo musügä aligilo igi äbä gadoi hamoi gabula säi.

18 Amala hamoila säi amo nabalahilä, gobela ïlo busa amoliage, mala dawadigi amoliage, Yesu abeahäla nufulödula hogosa nelo. E nufulö helësëi amoïe mida, ebalä bedähalea. Ebalä bedäi amoïe mida, udia dolö nefolalo sulubadelaea ea mala olelei amo nabalahilä, fudugisebegi. 19 Säha nea së gäsebegi, Yesu ïe bëgëla aulo amolali gaamu amo dïgïla asi.

Äfäeo i bausoi amoïe ado säi

(Madiu 21.20-22)

20 Ili diala yose awähalea beahamelebe, äfäeo amo bäu difige bausosa maadei neebe melï. 21 Bealahilä Yesuea säi amo helësëlahilä Fidaea ema sähalea, Säla Olelelo, bimo. Dia äfäeoma habobala säi amo bausoi gabuwela säi. 22 Amala säsebegi, Yesuea ilima säla obëgësalea, Godema asigi afädë negemalo. 23 Na dilima dofä sähawe, Dolö afädëa asigi äudä negela made, segebi gowema sähalea, Dihï duhulugi dagabola digamola säseda, ea säi amo dofä amamolöla helësëseda, ea säi amo gadola amamolömelë. 24 Amase, na dilima sähago. Dilia Godema adola nelebo afädë ema nabaseda, dofä nimolöla helësëmalo. Amala helësëla nabaseda, dilia säi amo gadoi nimolömelë.

25 Dilia Godema nowela nea adosalea, dolö afädëa dilima asiala hamoi amo helësëseda, dolö amea asiala hamoi amo fisimalo. Amala hamoseda, dilile Diado selesaia mosöa neebe amea, dilia asiala hamoi amoge fisimolömelëla säi.

Yesu dia geloi gaula neebe go nowëa ïla nabi

(Madiu 21.23-27, Ulugu 20.1-8)

27 Ili Yalusaleme bu obëgëlahilä Yesu e gobela ïlo mosöa awäla nebegi, gobela ïlo busa amolige, mala dawadigi amolige, dolö dafidilo amolige, e neebea ami maalahilä, 28 ilia ema nabahalea, Nelebo dia hamosebegoda nowëa hamomalasiola nabi. 29 Amala nabasebegi, Yesuea ilima säla obëgësalea, Na dilima afädë nabahago, dilia säla obëgëseda, na nelebo hamosa neebewe hamomäia geloi ï amoda gowea ïla dilima säla ïmolömelë. 30 Yonea ödägi gesa nelo amo Godeïe galueale ma, dolöïe galueale. Nema säla ïmola säi. 31 Amala säsebegi, hilido didiähalea, Nilïa selesaia galueala säseda, dilia ema asigi afädë negela made nelo goda edoïela sämolö gabugi, 32 nilïa dolöïe galueala sämolö gaso, udia dolö yafie nefolalebe amoliada Yoneda Godeïe bea sälo afädë neala helësëi neebe amo helësëlahilä udia dolöbalä bedäi. 33 Amalahilä ilia Yesuma säla obëgësalea, Nilïada dawa mademelëla säi. Amala säsebegi, Yesuea ilima sähalea, Amai galëda, na nelebo hamosebeweda gowea hamomalai hamosa neala, nage dilima säla ïmolö mademelëla säla ï.